استاد صراف تبریزینی ائتمه ییم نئیلیم شعری ؟

ائتمه ييم نئيليم؟ - صراف تبریزی

گؤزوم ياشين كؤنول قانيله مرجان ائتمه ييم نئيليم؟

بو آق دري شبيه لعل جانان ائتمه ييم نئيليم؟

قوروموش ني كيمي هر بند بنديمدن چيخار ناله

اسير بند عشقم آه و افغان ائتمه ييم نئيليم؟

چكيبدور سينه مه دود سيه تك آيريلوق داغي

بناسين تيشه آهيله ويران ائتمه ييم نئيليم؟

انيسيم درد و محنت مونسيم غم همدميم ناله

بو جمعيتله دنياني پريشان ائتمه ييم نئيليم؟

دوتولموش خاطريم گؤر اهل شهرون ازدحاميندن

بويور مجنون كيمي عزم بيابان ائتمه ييم نئيليم؟

گؤزوم ياشي آخار هجرينده مرواريد غلطان تك

اوني خون جگرلن قانه غلطان ائتمه ييم نئيليم؟

دئيرلر شربت لعل لبون هر درده درماندور

بولورسن اهل دردم ميل درمان ائتمه ييم نئيليم؟

مني بيجا يئره ائيلر مذمت زاهد بي دين

گورنده كفر زولفون ترك ايمان ائتمه ييم نئيليم؟

ائديبدور باغريمي قان لبلرون قوي بير ايچيم قانين

بو باشسيز مملكتده قانيمه قان ائتمه ييم نئيليم؟

يقينمدور اوركدن چيخسا پيكانون چيخار جانيم

گؤزل جان تك اوني سينه مده پنهان ائتمه ييم نئيليم؟

مني يالقوز گؤرنده تُرك مستين قصد جان ائيلر

خط و خالون خيالين مونس جان ائتمه ييم نئيليم؟

بو بازار محبت ايچره صراف تهيدستم

يتيم درّ اشكي زيب دكان ائتمه ييم نئيليم؟

استاد کریم مشروطه چی دن بیر شعر

خزان اولجاق سوسار بولبول ولي بستاندان آيريلماز

اؤزو ساكت  اولورسا ، فطرتي  داستاندان  آيريلماز

 

منه  غربت  بهشت  اولسا ، نهايتده  غريبم  من

آنايورد قايغيسي، هئچوقت آييق وجداندان آيريلماز

 

وفاني، ظلم ايله سورگون دوشن يوسف دن اؤيرنديم

اؤزو قول تك ساتيلميشسا، اوره ك كنعاندان آيريلماز

 

بلادان جان  قاچيرماز عهدينه  ثابت  قالان  عاشق

آدي اوستونده دير، طوفان قوشو طوفاندان آيريلماز

 

دئسم  جانيم  سنه قربان ، ده گيل  بو  شأنينه  لايق

دئسم كؤنلوم سنه پيشكش، كؤنول كي، جاندان آيريلماز

 

شاخان شيمشكلري سؤندورمه ظالم، سن بيليرسن مي

كي  اودلار اؤلكه  سينده ، اود - الوو  وولقاندان  آيريلماز

 

جهاندا كيم گؤروب قان قارداشي قارداشدان آيريلسين

قورو جان، جاندان آيريلسا ، قيزيل قان قاندان آيريلماز

  

رياسيز عاشق اولسان ، آيريليق افسانه دير ، سؤنمز

حقيقي عشق بير بالدير كي، شهدي شاندان آيريلماز

 

قان آغلار خورشید خانیم ناتوان

سحرگه ناگهان گؤردوم، دیل زاریم نهان آغلار،
سرشک آل ایله هر دم چکر آه و فغان آغلار.

سئوال ائتدیم، نه باعث دیر چیخیب افلاکه افغانین،
تؤکر خون جگر چشمین، باخار هر یان، روان آغلار.

کؤنول هوشیار ایمیش مندن، دئدی باد صبادن سور،
سراسیمه، قالیب حئیران، چکر آه، الامان آغلار.

صبادن سوردوم احوالی کی، ای هر حالیدن آگاه!
نه واقع دیر، سین تاری، اولوب دیل ناتوان آغلار.

دخی باد صبا گؤردوم، بسی دلگیر نالان دیر،
تکلم یوخ بیان ائتسین، قالیب دیر بی زبان، آغلار.

توتولموش نطق گفتاری، دئدی: – ای ناتوان خسته،
نئجه شرح ائیله ییم حالی کی، جمله انس و جان آغلار.

گزردیم باغ صحرانی، پریشان حال ایله، گؤردوم،
دییب باد خزان سروه قوروتموش، باغبان آغلار.

زبان سؤزدن قالیب خالی، ترحم ائتدیم احوالی،
گؤزومه تار اولوب دونیا، دمادم جسم و جان آغلار.

بلی، گر گول بوداغینه، توخونسا تند باد دهر،
پریشان اولسا گول برگی، ائدر بولبول فغان آغلار.

پوزولدو رؤونق گولشن، داغیلدی زینتی باغین،
دوشوب تاب و طراوتدن، گول آغلار، گولسیتان آغلار.

دوشه یدی چرخ گردشدن، اولایدی دهر دون ویران،
بشر تاب ائیله مز هرگز، زمین و آسمان آغلار.

الهی، گؤرمه سین گؤزلر یامان گونده بئله گونلر،
آمان وئرمز غم و محنت، هامی پیر و جوان آغلار.

فراوان دیر غمیم، شرحین بیان ائتمک دئییل ممکن،
یاز، ای مصطوفی عالم، مدام اهل جاهان آغلار.

مداد اولسا اگر دریا، قلم اولسا اگر اشجار،
باشا یئتمز غمیم شرحی، قلم هر لحظه قان آغلار.

تنیم رنجور، دیل خسته، داخی بیر غمگساریم یوخ،
کیمه کیم، شرح ائدیم دردیم، گئدر تاب و توان آغلار.

بلی، چون کؤوکب طالع قبال ائتسه فلاک ایچره،
نوحوستله قیران ائیلر، اولور گون گر یامان، آغلار.

بو، دیوان قضاوت دیر، مقدّر روز ازلدن،
کی، هر دم نؤوع به نؤوع غملر یئتر، بو ناتوان آغلار.

کسیلمیش طاقت و تابیم، باشیمدان عقل محو اولموش،
گؤزوم اشکی روان ظاهر، کؤنول دایم نهان آغلار.

دواسیز، درد بی درمان قالیب محزونی سرگردان،
ارسطو ایله لقمان، فلاطون زامان آغلار.

تماما درد و غملردن، فراقین دردی افزون دور،
اونون اوچون ناتوان هردم اولوب نالان، قان آغلار.

نسیمی دن بیر شعر

تا اوزون گوردوم نیگارا غمدن آزاد اولموشام

         

                                       قوللوغوندا پادشاهم حسنونه شاد اولموشـــــــام   

 

گلمــــیشم دیدارینه تا جانـیـمی قربـان ائــــده م

 

                                      ای دوداغی جان شیرین گورنه فرهاد اولموشام

 

تاپدی عشقین کونلوم ایچره حقه لاییق بیر مقام

 

                                      گور نه عالی وجهه ایله مهرینده بنیاد اولموشام

 

تاجمالین مصحفـــیــندن اوخورام سبع المثـــانی

 

                                     سبعه خوان حافــــظم قرآندا استاد اولموشـــــام

 

من عراق ایچیینده گزدیم بیرموحـــد گومه دیـم

 

                                     عاشیق مصرم بوگون مشتاق بغداداولموشــــام

 

قوللوغونــــــدان تا منی قیــــلدی جدا دورفلک

 

                                      حسرتیندن من غلام سرو آزاد اولموشـــــــــام

 

چون سنی گوردو نســـیمی دئر به آوازبـــــلند

 

                                      عشقیله من آشنـــایم عقلیله یاد اولموشــــــــــام

 

 

" نسیمی "

 

حسینون نوحه سین دلریش یازاندا

مسلمان سهلیدیر که کافر آغلار

کور اولموش گؤزلرین قان توتدو شیمرون

کی گؤرسون اؤز الینده خنجر آغلار

حسینون کؤینه گی زهرا الینده

چکر قئیحا قیامت ، محشر آغلار

آتاندا حرمله ، اوخ کربلاده

گؤرئیدین دوشمن آغلار ، لشگر آغلار

قوجاغیندا ، گؤرئیدین ام لیلا

آلیب نعش علی اکبر آغلار

رباب ، نیسگیل دؤشنده سو گؤرنده

علی اصغری یاد ائیلر آغلار

باشیندا کاکل اکبر هواسی

یئل آغلار ، سنبل آغلار ، عنبر آغلار

یازاندا آل طاها نوحه سین من

قلم گؤردوم سیزیلدار ، دفتر آغلار

علی ، شق القمر ، محراب تیلیت قان

قولاق وئر ، مسجید اوخشار منبر آغلار

علیدن شهریار ، سن بیر اشاره

قوجاقلار قبری ، مالک اشتر آغلار 
شهریار

دنیا نه یالان تاپماجادیر؟ شعر: شهریار

ایل کئچدی، باهار اولدو، خبر یوخ گولوموزدن،

گول آچمادی، قووزانمادی سس بولبولوموزدن.

بایرام گونوموز، یاسلى گؤروشلرله کئچر کن،

شادلیق نه اوماق بیز آییمیزدان ایلیمیزدن

تقویم آلابیلمم اله، گؤردوم منه تقویم،

«گؤزداغ» دىکى (تقویمى) ده گئتدى الیمیزدن.

بیز باغچامیزى بئلیه بیللیک؟ داهاهیهات!

نایمید اجلین بئلداری وورموش بئلیمیزدن

(تقویمى) اولاردان دی کى، یاددان چیخابیلمز،

یاددان نئجه چیخسین، آدى دوشمور دیلیمیزدن

ائل ایچره، باشى بیریئره گاهدان اوییغاردى،

اوگئتدی، ییغینجاق دا ییغیشدی ائلیمیزدن

یولداش سپه لندى، ائله بیل سام یئلى اسدى،

سرسام دى قالان بیزلره، بوسام یئلیمیزدن

دنیا نه یامان تاپماجا دیرباش چخاران یوخ،

بیزباش تاپاق آنجاق، بوقوبول- منقلمیزدن.

(تقویمى) کیمى دوز کیشى؟ هیهات تاپیلماز،

بیر شمع دى کى، کؤچدو بیزیم محفیلیمیزدن

اوچ نازلى بالا، همسر ایله قالدیلا- باشسیز،

یانساق دا اود ال چکمیه جکدیر کولوموزدن.

بیر (کافیه) اوندان باجارى یادگار اولسون

باش یولمادا، بیرتئلدی قالان کاکیلمیزدن

ائل بیرده دئسین: «سئل سارانى قاپدى قاچیرتدى»،

آغلاشدى بولودلاردا بوداشقین سئلیمیزدن

بیر مزرعه دیر (شهریار) ین عومرو، نه حاصل،

سئل، قویمورو بیرچؤپ ده قالا حاصیلیمیزدن

علی آقا واحید

سئوگیلیم،عشق اولماسا،وارلیق بوتون افسانه دیر

عشقیــده ن محــروم اولان،انسـانلیغــا بیگــانه دیر

ادامه نوشته

گوز گونلری نین شعری

چوخ بیرزامان آیریلیقدان سونرا  سلام و حورمتلریمی بوتون اوخوجولارا اتحاف ائدمکدن سئوینیرم

بیر آرا درس باشیمی چوخ قاتدی سیزینله ایلگی آزالدی ایندی ایسه بو آماجدایام سیخ سیخ وبلاقا باش وروب یازام و یازیلاری تزه له یم

قاباق دا گوز گلیر و یاخود پاییز گلیر سون باهار گلیر هرنه دئسک

یاشاییش هله دوام ائدیر .

دوسلارلا بئله بیر قرارا گلدیک سون باها پویزاسی اولان شاعیرلر اوچون بیر یاریش دوزه نله یک

بو یاریش دا اشتراک ائتمک بیر یازی یا بیر شعری ایله مومکون اولور

یازیلاری یاخود شعریلرینیزی  قیسا بیوگرافی ایله بو ایمیل [e-mail]   عنوانینا گونده مزنیز یئترلیدیر

یازیلار و شعری توپلو شکیلده چاپ اولاجاق

سیزین گوزه ل یازی و گونجل شعریلریزی گوزله ییریک

هله هله ساغلیک لا قالین

منی جاندان اوساندیردی ؟!

منی جاندان اوساندیردی ، جفادان یار اوسانمازمی؟    

                                                       فلک لر یاندی آهیم دان ، مرادیم شمعی یانماز می ؟
هامی بیمارینا جانان ، دوای درد ائده ر احسان
                                                            نئچون قیلماز منه درمان ، منی بیمار سانمازمی ؟
شب هجران یانار جانیم ، تؤکر قان چشم گریانیم
                                                              اویادیر خلقی افغانیم ، قرا بختیم اویانمازمی ؟
گل رخسارینه قارشی ، گؤزومدن قانلی آخار سو
                                                            حبیبیم فصل گول دور بو آخارسولار بولانمازمی ؟
غمیم پئنهان توتاردیم من ، دئدیلر یاره قیل روشن
                                                              دئسم او بی وفا بیلمم اینانارمی ، اینانمازمی ؟
دئییلدیم من سنه مایل ، سن ائتدین عقلیمی زایل
                                                  منه طعن ائیله ین غافیل،سنی گؤرجه ک اوتانمازمی؟
فضولی رند و شیدادیر ، همیشه خلقه رسوادی
                                              سوروشون کی نه سوودادیر،بو سوودادان یورولمازمی ؟

 فضولي نين اونودولماز و اورك لر يانديران شعري

کئف چکملی ایام !!!!

آخ نئجه کئف چکمه لی ایام ایدی

اونداکی اولاد وطن خام ایدی

اؤز حق مشروعینی بیلمزدی ایل

چهره حریته گولمزدی ایل

گؤزلرینی بیر کره سیلمزدی ایل

غزته یه ژروناله اییلمزدی ایل

دائم ائشیتدیکلری اوهام ایدی

آخ نئجه کئف چکمه لی ایام ایدی

 

اولکه ده بونجه یوخیدی عیب جو

نئیلردیکسه گؤزونوردو نکو

خلق ده دیداریمیزه آرزو

بیزده واریدی نه گؤزل آبرو

حرمتیمیز واجب اسلامیدی

آخ نئجه کئف چکمه لی ایامی دی

 

ملته چاتدیقجا غم عیاش ایدین

حاکمه یار ، آمره قارداش ایدین

قبله طاعتگه اوباش ایدین

هاردا آش اولسایدی اورا باش ایدین

هر گئجه هر گون بیزه بایرام ایدی

آخ نئجه کئف چکمه لی ایام ایدی

 

گرچه ریا ایدی بوتون کاریمیز

کاریله برعکس ایدی کرداریمیز

لیک همان وار ایدی مقداریمیز

حجت ایدی هر کسه گفتاریمیز

خلقین ایشی بیزلره اکرامی ایدی

آخ نئجه کئف چکمه لی ایام ایدی

 

عیبیمیزی چولقالامیشدی عبا

هرنه گلیردی بولاشیردی قابا

کیم نه قانیردی نه دی زهد و ریا

ناخوشه خاک دریمیزدن شفا

صومعه میز کعبه احرار ایدی

آخ نئجه کئف چکمه لی ایام ایدی

 

بیزلریدیک خلقین ایناندیقلاری

پیر هدایت دییه قاندیقلاری

نور گؤروردولر قارانلیقلاری

بیزده ایدی جمله قازاندیقلاری

کیم بیزه پول وئرمه سه بدنام ایدی

آخ نئجه کئف چکمه لی ایام ایدی

 

ایندی آداملار دیه سن جن دیلر

جن نه دی شیطان کیمی بی دین دیلر

لاپ بیزی اووسارلادیلار میندیلر

آی کئچن ایام اولاسان ایندی لر

اونداکی اولاد وطن خام ایدی

آخ نئجه کئف چکمه لی ایام ایدی

 

رحمتلیک صابیر ین آذربایجان مشروطه انقلابی زامانی یازیلمیش بیر شعری اوخوماغا ده ییر

 

نه ایشیم وار !!

ميلت نئجه تاراج اولور اولسون نه ايشيم وار؟
دشمنلره محتاج اولور اولسون نه ايشيم وار؟
قوي من توخ اولوم اؤزگه لر ايله ندي كاريم،
دونيا وجهان آج اولور اولسون نه ايشيم وار؟

سس سالما،‌ياتانلار آييلار، قوي حله ياتسين،
ياتميشلاري راضي دئيلم كيمسه اوياتسين،
تك تك آييلان وارسادا، حق داديما چاتسين،
من ساليم اولوم جمله جهان باتسادا باتسين،
ميلت نئجه تاراج اولور اولسون نه ايشيم وار؟
دشمنلره محتاج اولور اولسون نه ايشيم وار؟

سالما ياديما صحبتي تاريخي جهاني،
ايامي سلفدن دئمه سؤز بيرده فيلاني،
حال ايسه گتير دلماني، ناني،
موستقبلي گؤرمك نه گرك،‌عؤمردو فاني،
ميلت نئجه تاراج اولور اولسون نه ايشيم وار؟
دشمنلره محتاج اولور اولسون نه ايشيم وار؟

اؤولادي وطن قوي هله آواره دولانسين،
چيركاب سفالتده، الي باشي بولانسين،
دول آروات ايسه سائيله اولسون اودا يانسين،
آنجاق منيم آوازه شانيم اوجالانسين،
ميلت نئجه تاراج اولور اولسون نه ايشيم وار؟
دشمنلره محتاج اولور اولسون نه ايشيم وار؟

هر ميلت ائدير صفحه دنياده ترقي،
ائيلر هره بير منزل مأواده ترقي،
يرقان دوشگيمده دوسته گر ياده ترقي،
بيز ده ائديريك عالم رؤياده ترقي،
ميلت نئجه تاراج اولور اولسون نه ايشيم وار؟
دشمنلره محتاج اولور اولسون نه ايشيم وار؟

صابیردن

ملامحمد فضولی دن گوزه ل بیر قصیده

سو قصيده سي

ساچما اى گؤز اشکدن کؤنلومده ‏کى اودلاره، سو،
کيم بو دنلى توتوشان اودلاره، قيلماز چاره سو.

آبگون دور گنبد دوّار رنگى، بيلمزم
يا محيط اولموش گؤزوم دن، گنبد دوّاره سو؟

ذؤوق تيغيندن عجب يوخ اولسا کؤنلوم چاک - چاک
کيم مرور ايلن بوراخير رخنه‏لر ديواره سو.

وهم ايلن سؤيلر دل مجروح پيکانين سؤزون،
احتياط ايلن ايچر هر کيمده اولسا ياره، سو.

سويا وئرسين باغبان گلزارى، زحمت چکمه‏سين،
بير گول آچيلماز يوزون تک، وئرسه مين گلزاره سو!

اوخشادا بيلمز غُبارينى محرّر، خطّينه
خامه تک باخماقدان ائنسه گؤزلرينه قاره ‏سو.

عارضين ياديله نمناک اولسا مژگانيم، نولا؟
ضايع اولماز گول تمنّاسيله وئرمک خاره سو!

غم گونو ائتمه دل بيماردان تيغين دريغ،
خئيردير وئرمک قارانقو گئجه‏ده بيماره، سو.

ايسته پيکانين کؤنول، هجرينده شؤقوم ساکن ائت،
سوسوزام، بيرکز بو صحرادا بنيمچون آره سو.

بن لبين مشتاقى‏يام، زهّاد کوثر طالبى،
نئته‏کيم مسته مى ‏ايچمک خوش گلير، هشياره سو!

روضه‏ى کويونا هردم دورماييب ائيلر گذار،
عاشق اولموش غالبا، اول سرو خوشرفتاره سو.

سويولون اول کويدان توپراق اولوب توتسام گره‏ک،
چون رقيبيم‏دير داخى اول کويه قويمان واره سو!

دستبوسو آرزوسو ايله گر ئولسم، دوستلار!
کوزه ائيلين توپراغيم، سونون اونونلاياره، سو.

سرو سرکشليک قيلير قُمرى نيازيندان، مگر
دامنين توتا آياغينا دوشه، يالواره، سو!

ايچمک ايستر بولبولون قانين مگر بير رنگ ايله،
گول بوداغى‏نين مزاجينه گيره قورتاره‏ سو!

طينت پاکينى روشن قيلميش اهل عالمه
اقتدا قيلميش طريق احمد مختاره سو.

سيد نوع بشر، درياى دُرّ اصطفا
کيم سپيبدير معجزاتى، آتشِ اشراره سو.

قيلماق ايچون تازه،گلزار نبوّت رؤنقين
معجزوندن ائيله‏ميش اظهار سنگ خاره سو.

مُعجزى بير بحر بى‏پايان ايميش عالمده کيم
يئتميش آندان بين- بين آتشخانه‏ى کفاره سو.

حئيرت ايلن بارماغين ديشلر کيم ائتسه استماع
بارماغيندان وئرديگى شدت گونو انصاره سو

دوستو گر زهرمار ايچسه، اولور آب حيات،
خصمى سو ايچسه، دؤنر البته زهرِ ماره سو

ائيله‏ميش هر قطره‏دن مين بحر رحمت موج خيز،
ال سونوب اورقاج وضو ايچون گول رخساره سو.

خاک پايينه يئتم دئر، عُمرلردير متصل،
باشينى داشدان-داشا اوروب گزر آواره سو.

ذره- ذره خاک درگاهينا ايستر ساللانير
دؤنمز اُول درگاهدان، گر اولسا پاره- پاره سو!

ذکر نعتين وِردينى، درمان بيلير اهل خطا،
ائيله‏ کيم دفع خمار ايچون وئره مئيخواره سو.

يا حبيب اللَّه! يا خير البشر! مشتاقينام،
ائيله ‏کيم لب‌تشنه‏لر يانيب ديلر همواره سو!

سنسن اول بحر کرامت، کيم شب معراجدا،
شبنم فيضين يئتيرميش ثابت و سيّاره سو.

چشمه‏ى خورشيددن هر دم زُلالِ فيض ائنر،
حاجت اولسا مرقدين تجديد ائدن معماره سو.

بيم دوزخ، نار غم سالميش دل سوزانيما،
وار اوميديم ابر احسانين سَپه اول ناره سو.

يُمن نعتيندن گُهر اولموش فضولي سؤزلرى،
ابر نيساندان دؤنن تک لؤلؤى شهواره سو.

خواب غفلتدن اولان، بيدار اولاندا روز حشر،
اشک حسرتدن تؤکنده ديده‏ى بيداره سو

اومدوغوم اول دور کى روز حشر محروم اولمايام،
چشمه‏ى وصلين وئره من تشنه‏ى ديداره، سو.

ملا محمد فيضولي

شهریارین ناز ائله میسن غزلی

چوخلار اینجیکدی کی، سن اونلارا نازایله میسن

من ده اینجیک کی، منیم نازیمی آز ایله میسن

ائتمیسن نازی بو ویرانه کونولده سلطان

ائوین آباداولا ، درویشه نیاز ایله میسن

هر باخیشدا چالیبان کیپریگی مضراب کیمی

بیر قولاق وئر، بوسینیق قلبی نه ساز ایله میسن؟

باشدان آچ یایلیغی ، افشان ائله سوسن - سنبل

سن بیزیم بایراممیزسان قیشی یاز ایله میسن

سن گون اول، قوی غم میز داغدا قار اولسون، اریسین

منیم آنجاق ایشیمی سوز و گداز ایله میسن

من بو معناده غزل یازمالی حالیم یوخودی

سن جوجوق تک قوجانی فرفره باز، ایله میسن

کاکلی باشدا بوروب باغلامیسان تاج کیمی

او قیزیل ساچدان اونا ، گوللی قوتاز ایله میسن

سینه بیر دشت مغان دیر ، قوزی یان - یانه یاتیب

منیم آغلار گوزومی ، اوردا آراز ایله میسن

بو گوزللیک کی جهاندا سنه وئرمیش تانری

هر قدر ناز ائله سن ایله، کی آز ایله میسن

منی بو سوز یله آتدین، آرالاندین بیلیرم

آرانی بیر پارا نامردیله ساز ایله میسن

دستماز ایله دیگین چشمه، مسیحا قانی دیر

بیلمیرم هانسی کلیساده نماز ایله میسن؟

من < عشیران > اوخوسام، پنجه < عراق > اوسته گزه ر

گوزلیم، < ترک > اولالی ، ترک < حجاز > ایله میسن

تازا شاعر، بو ده نیز هرنه باخیرسان دیبی یوخ

چوخ اوزاتسان بو غازی، اورده گی قاز ایله میسن

بسکه زلف و خط و خالین قوپالاغین گوتدون

زلفعلی نین باشینی آزقالا داز ایله میسن

گل ! منیم ایسته دیگیم کعبه ییخیلماز، اوجالار

باشدادا کژ گئده سن ، دیبده تراز ایله میسن

خط و خالیندن آلیب مشقیمی قرآن یازارام

بو حقیقت له منی، اهل مجاز ایله میسن

منی، دان اولدوزی، سن یاخشی تانیرسان که سحر

افقی خلوت ائدیب راز و نیاز ایله میسن