تورکجه یازیشمالار

بونلار , ( ایدینلار ) بوتون مراملاریندا , دئدیکلرینده و هابئله ادعا و تظاهر ائتدیکلرینه گوره , بوتون ظلم و ستم ایله دشمن و باریشمازدرلار , و حزب و مسجد بونا گوره دائر و آچیلیب کی بوتون یئر اوزونده هر جوره حقسیزلیگی , ملی و ﻧﮋادی تعبیضلری و طبقاتی استعثماری محو ائتسین .

بورادا منظور , فقط تورک ( انسان ) سئونلری و حق یولوندا چالیشماق ادعاسی ائدنلریدر , یوخسا باشقا کیمسه لر و ملتلر ایله ابدا ایشیمیز یوخدر و اولاردا بیل مز.

بو آیدینلار , ( روشنفکرلر ) و حقانیت و حریت سئونلر , نه دن حاکم اولان دیلی ئوز ائولرینین یوخاری باشیندا او تورودوبلار و ئوز محکوم اولان دیللرین تپیک ایله ووروپ ائشیکه توللایبلار ؟

بونلار , نه دن و نییه ئوز بالالارینین بوغازینا ئوزگه دیلی سوخوبلار و ئوزگه لر طرفیندن محکوم اولان دیللرین ئوز ارشاقلارینا قدغن ائدیب و یا اونی گوزدن ایتیریبلر ؟

بو ایشلر , اگر بیرلیک , دوستلوق , تفاهم , هموطن هابئله اسلام و گمونیست اوچون ایمیش و انسانلیغین ئوزرنگی و یا نمونه سی ایمیش , بس نه دن ئوزگه لر مثلا: ( عجم جنابلاری ) بئله بیر ایشلره و ادالارا قیمت و احترام قویمازلار ؟

وحتی بیزیم دیلیمیزایله اولدوقجا و اللریندن گلدیکجه یرتیجی و قان توکر خصومت و دشمنلیکده ائدیبلر ,   ائدیرلر و ائده جکلرده .

بونلار, اسلامدا ( اخوان المسلم ) یا اسلام قارداشلیغین بهانه ائدیب ملتلر و قوملارین آنا دیللرین سایماز سایماز گوزلردن سالیبلار , و او بیریلری , یعنی سوسیالیست و گمونیستلر , ( انترناسیونالیسم ) ی بهانه ائدیب , ملیت و دیل سئومگی ( شئونیست و فاشیست ) تامغاسی و حربه سی ایله محکوم ائدیب ازیبلر , لاکن همین اوندان ترکیب و قوراشیلمیش اولان عجملر , اسلامدا دا , شاهلیغدا دا , گمونیست و سوسیالیسمده ده , ملیت و ملی دیل تشخصلرین اونو تمادان , اونا بویوک بیر هویت , ملی اردم وارلیغین و گوزللیگین آرتیرمیشلار و گوسترمیشلرکی ملیتی , مرام و مسلک بهانه سینا ساتمازلار .

بودرکی اونلار , چون ملی وارلیغلارین ( انا) اولاراق تانییرلار و اونا درین درین گووه نیرلر , آیدیدندر کی توتدوقلاری عقیده نی و یولودا آیدین بیلیرلر. و آچیق تانییرلار .

بونلار بیر شئیی اله گتیرمیرلرکی یبر بهالی شئیی الدن وئرسینلر , ائولرینی اثاث بهاسینا ساتمیرلار , چونکی ائو ( آنا ) اولمادان اثاث یئرسیز قالار , لاکن ائو اولان یئرده , تازا گلن اثاث اونی بزه ر و گوزه للندیرر .

هر گون و هر ایل , و یوز ایل انقلابلاردا , قیاملاردا قیزغین شرکت ائدن تورکللر , جانلاری و قانلاری اوجوز توکولن , و هابئله آرواد – اوشاقلاری اسیر اولان تورکلر , همیشه ئوزگه لر اوچون قویروق و یدک ( دنباله رو ) اولوبلار , و انقلابلار و قیاملار قوتاراندان , و یئر یئرین , و سوسویون اولاندان سونرا , قیاملاردا و انقلابلارا حیله لر ایله گیرنلر , اونلارا دئیبلر , قاچین گئدین , خاطر جمع اولون کی ایش و موفقیت اله گلدی , ملت آزاد اولدی , بوندان سونرا داها یئمک و ایچمک و هر شئی بول اولاجاقدر .

آنجاق بو , ( تورک انقلابچیلاری ) اونلاردان هیچ بیر کرنده اولسون سوروشمایبلار کی , فلانی , سیزکیمسیز ؟ کی بیزه قاچین گئدین دئیرسیز ؟

چونکی بونلار, دوغروداندا ( قاچین کئدین ) سوزونه لایق و یاراشان ایمیش لر , یوخسا انقلابلارا و قیاملارا گیرمه دن اول , ئوز ئوزلریندن هیچ اولمازسا بیرکرن سوروشاردیلارکی , بو انقلابلاردان , و بو قانلی قیاملاردان دوغروسی نه ایسته یریک ؟ وبیزه بونون درین و ملی قازانجی نه در ؟

بونلار, هر انقلابا و هر قیاما گیرنده , تکجه بیر شئی بونلار اوچون ئونملی , و جالب ایمیش , اودا یاخشی یئمک , یا خشی گیمک و یا دینچیلر اوچون مسجدلر ده آزاد سینه وورماق و دویونجا گوز یاشی توکمک و بیر آیاق چاریق , و بیر ایاق گیوه زیا رته کئتمک , و سولچولار ایسه , حزبلرده اودلی اودلی دانیشیق و زنراللیق میدالین گوزله مک و سونوندا , حزب باشقانی اولماق .

ئوزون و هدفین و معنویتین تانیمادان , بو تمنالار و دیلکلر , بوسبتون مادی و حیوانی تقاضالاردر و ایچینده ابدا ائله بیر ملی اردم , ملی هویت و ملی معنویت گوزه چارپمیر و حله ده بئله در .

بوتون بو انلابلاردا و قیاملاردا , بونلاردان سوروشسان کی سیز نه ایسته یرسیسز ؟

دیلک و تمناز نه در ؟ مطلقا آیدین و دوزگون بیر جواب , انسانی و ملی بیر سوز ائشیتمک ممکن دگل .

بوتون بوانقلابلاردا , انلی انلی کبابلار , بول بول یئمکلر یاخشی یاخشی ایچمک و گیمک , و سونرا مقام و رتبه آرزوسی سولچولارا .

آزاد آزاد قمه وورماق , و اوشاق گوز یاشلاری توکمک و نوحه دئمک , و شبیه چیخارتماق و سینه وورماق دینچیلره .

قانلی و تالانچی انقلابلاردا و قیاملاردا , فرصتدن استفاده ائتمک و اسلحه اله گتیرمک و یول کسمک و هابئله آدام ئولدوروب و یا اسلحه آلیب ساتماق بوتون آرالیق و آنارشیست آداملارینا – هر بیر نئچه مدتده , قیام و انقلاب آدینا بهانه در , یوخسا هانکی بو قانلی قیاملاردان تورک اوچون ملی و قیمتلی بیر نتیجه اله گلیبدر ؟ و ئوزون ئوزگه لرین اسارت زنجیرلریندن سون اولاراق قورتاریبدر ؟ وارسا گوسترین .

چونکی , بوتون بو انقلابلاردا و ئولدوروجی قیاملاردا , هیچ بیر ملی استقلال و ملی دیل هویت و ها بئله ئوزونه دایانان و درین بیر ایمان ایله دوزگون نقشه لر , و استراتیزیک هدفلر گوز ائوینه آلینمایبدر .

کیچیک کیچیک عقده لر , خصوصی هوسلر , و ئوته ری شکایتلر مایه اولوبدر کی , ئوزگه لر , معین بیر موضوع و هدف اوچون هو سالاندا و قیشقیریق یایاندا , انقلاب آدینا اونلارین آردینجا سورونک , و اونلار هدفه و مقصده چاتاندان سونرا , ساللان بوللان , الی قولوندان اوزون یئریمیزده قایداق , اونودا تالانماساق و ئولمسک .

بودرکی بونلار , قره قوللار ( سیاه لشگر لر ) کیمی هر انقلابا , هر حیله لی قیاما گیریبلر , وار یوخدان چیخیبلار و قیاملار و انقلابلار قورتاراندان سونرا , قره قوللار کیمی مرخص اولوب هره بیر یانا ایتگین – باتغین , داقیلیبلار .

هر کیم بونلاردان , ملیت , دیل و استقلال اوچون سئوال ائتسه و سوروشسا کی بو , انقلابلاردا و قیاملاردا , نه دن و نییه ملی مسئله , ملی حاکمیت و شرف عنوان اولمورو یا انقلابلار و قیاملار قورتاراندا بو حقانیت اله گلمیر ؟

لاپ آیدینلاری جواب وئررلرکی یوخسا بو چوخ مهم بیر مسئله در ؟ بو مهم مسئله اولسایدی , فاسلاردا بونون اوچون قیشقیریق و سس سالاردیلار , بس مهم دگل .

بودرکی بونلار ( تورک آیدینلاری ) یئمکن , ایچمکدن و مادی لذت لردن باشقا , انقلابلارین و قیاملارین نه اولدوغون آیدینجا بیلمیر لر , بیلسئیدیلر مشروطیتدن و آیری انقلابلاردان عبرت و درس آلاردیلار و ئوزگه لره قویروق و یدک اولمازدیلار.

بونلار (تورک آیدینلاری )هنوز بونی بیلمیرلرکی (عجملرین ) ملیت و دیل و فرهنگ اوچون خاطرلری جمعدر و بو تشخیص و هویت اونلار اوچون ایللر بویودرکی اله گلیب و ئوزلریندن باشقا ,حله ئوزگه لره ده بو دیلی , تحمیل و اجباری ائدیبلر , و بو خصوصدا , یعنی ملی حاکمیت و ملی استقلال اوچون اونلارین داها چتین  بیر ایشلری و عقده لری و نگرانچیلیقلاری یوخدر , یالنیز بو تورکون و یا سنین دیلیندرکی غیر قانونی اولوب و هویت اولوب و هویت و ملی تشخصین ایتگین , و ئوزونده بو خصوصدا گودن و عارسیز سان .

هر بیر ایشچی و یوخسول گمونیست تورکدن , سوروشسان کی ملیت و دیل اوچون نه دویورسان و نه حس ائدیرسن ؟

فورا جواب وئررکی حله آج لیقدان و یوخسوللوقدان باش آییرمامیشام , حله چورک و حله ائو و یاشایش اوچون مبارزه ائدیرم و بونلار ( دیل و ملیت ) اوچون , حله وقت وار و انشالله انقلابدان و موفقیتدن سونرا , بودا ..... اولاجاق .

آنجاق همان بو , یوخسول و ایشچی تورک کمونیستی , اوزون بیر سوره دن سونرا , وارلی و زنگین اولاندا ن سونرا , و شاید کارخانه سی , آل – وئری و بانگلاردا پولی یاتاندان سونرا , ملیت و دیل حقینده , جواب وئرر , کی ( بوراخ جانیم ) یوخسا بو , ( عجم دیلی ) کی دانیشیرام نه عیبی وار ؟

من ایسته دیگیمه یئتیشمیشم , حله هردن ائوده اوشاقلاری ایله تورکجه دن دانیشارام , اونوتمامیشام .

و حله بیر آز برکیشسن , و بیر آز غترتدن و شرفدن دانیشسان , بو دوننکی یوخسول گمونیست و بوگ.نکی , کمونیست ادعالی میلینونر , جواب وئررکی ( ای بابا ) بو سوزلر نه در ؟ ملیت و دیل نه موضوعدر ؟

انسانلادا گرک وجدان و ملاحضه اولسون , دیل و ملیت , ﻧﮋاد پرست و فاشیست مرامی در .

گورونورکی بو , انقلابچیلار , و بو ایچی بوش قیامچیلار , انسانی , و وجدانی فقط مادی آرزولارا , و لذت تمنالارینا یئتیشمک هوچون بیلرلر و ایسته یرلر , و بوگوزه ل گوزه ل وجدان و انسانیت کلمه لرین اوندان – بوندان قاپاراق , بو سوزلرین ماسقاسی آلتیندا , یرتیجی , چیرکین قیافه لرین گیزله دیرلر , یوخسا وارلیغی و یاشایشی تکجه مال کیمی یئمله مک , مال کیمی قیقلاماق , و ئولوب گئتمک بیلمزدیلر , و هابئله اونون – بونون الینده آلت و دسیسه لری اوچون مواد خام اولمازدیلار .

و بو , تورک سولچولاری و تورک دینچیلری , دیلی و ملیتی عقیده و اعتقاد اوچون آتیب و مواد خام اولارکن , عجملر , مرام و عقیده توتماق ایله برابر , دیللرین و هویتلرین داهادا پارلادیرلار , و ئوزلرین درین بیر وارلیق اوچوم داهادا لایق گوستریرلر .

یوخسا عقیده و مسلک بوگون , دیل و ملیت اوچون انگل و مانع اولورسا , بس نه دن گئچمیشده کی شاعر لر , یازیچیلار ئوزگه دیللرده یازیب ؟ و ئوزگه دیللرده معروف اولوبلار کی بوگون دیللرده یازدیقلاری اوچون , ئوزگه لر , اونلاری ئوزلریندن ( عجم ) گوستریرلر , یوخسا , اونلاردا ( اخوان المسلم ) و یا ( انترناسیولیسم ) ایمیشلر ؟

نه دنسه , سورگون و ایتکین یاشایانلارو هویتین نه اولدوغون بیلمییه نلر , همیشه بهانه لرینده عوام یانیندا دائما موفق اولوب و اولورلار.

فاسلار دییرلرکی اورتا چاغدا , اوروپالیلارین چوخی مثلا:

فرانسه- انگلیستان – المان – هلند – لهستان – ملتلری علمی کتابلارین لاتینجا یازیردیلار کی لاتین همان ایتالیانین قدیم دیلیدر و بوگون کیمسه بو لاتین یازانلاری ایتالیالی حساب ائلمه یب و گرکده ائلمه سین , ولی نئجه اولوب کی قدیم فارسلار عربجه یازدیقلاری اوچون , اوروپالیلار اونلاری عرب بیلیرلرو حقیقتی دانیرلار ؟

بورادا , بو سئوالی بیز تورکلرده ؛ گرک عجم جنابلاریندان ائده ک کی بس بیزیم دوشونمزلریمیزده کی ئوز دیلین قویوب فاسجا یازیب , سیز نه اوچون اونلاری بوگون فارس تانیدیرسیز ؟

یوخسا ئوزوزی ووروبسیز بیلممه زلیگه و حقیقتی دانیرسیز ؟ و اگر اوروپالیلاردان راضی دگلسیز و بیر نوع اوغورلوقدر , بس سیز نییه اوغولوق ائدیر سیز ؟ لای لای بیلیرسیز نییه یاتمیرسیز ؟

و یئنه ده فاسلار , تورکییه نین لاتینجا یازدیقلاریندان سئوینیرلر , نییه و نه دن ؟ بونا گوره کی اونلارین , ایران تورکلری ایله اورتالاری قیریلیب , بیر بیر ینین خطین و نتیجه ده دیلین آنلامیاجاقلار, و آرالاریندا ئوزگه لیک توره نه جکدر .

اونلار, اسیر و یالقیز اولدوغوموزدان سئوینیرلر , و گئجه گوندوز ارییب یوخ اولماقیمیزدا نقشه لر چکیرلر , آنجاق بونی بیلمیرلرکی بونلارسیزدا بیز یالقیز و اسیریک , چونکی حله بیر بیریمیزی , ئوز ئوزوموزی ؛ آنا یورتدا تانیمیریق , قالسینکی باشقا بیر تورک قارداشینی تانیاق .

اونلارین حقی وارکی بیزیم تورکییه ایله ارتباطیمیزین قیریلدیغیندان و رابطه میزین اولمادیغیندان سئوینسینلر , چونکی بو سئوینمگی بیز اونلارا وئرمیشیک , بس قوی اونلار و ارمنیلرده سئوینسینلر .

عجم , تورکییه نین الفباسینین لاتین اولدوغوندان شنلیک و شادلیق ائدیر , حالبو کی تاجیکستانین روس لاتینجا یازیب اوخودوغوندان قاشقاباقین ساللایب و گوز یاشی توکور , چونکی بو لاتین الفبا اونلارین اورتالارینی – قیریب و بیر بیر ینه ئوزگه لشدیریبدر , و یئنه ده , پاکستانین و افغانستان نین لاتین یازاجاق اولاجاغیتدان , ایندیدن غم و غصه ائدیر , چونکی ئوزونی اونلار ایله بیرﻧﮋاد دان بیلیرو بو ارتباطین موهوم قیریلدیغیندان شیون چکیر و سیزیلدایر , حالبوکی افغانستان کیمی یئرلر تاریخلر بویی تورک الینده اولوب و تورک یاشادیغی اوچون , بیر ملته منسوب اولسادا یئنه ده تورکلره منسوب اولابیلر .

اونلار , ( عجملر ) بیزیم گوزه ل و غنی دیلیمیزدی , بو گون ایران بیرلیگی و وحدتی اوچون بویوک بیر خطر و قورخی بیلیرلر , حالبوکی یئرسیز اوشونورلر و یئرسیز قورخورلار , چونکی حله بونی یاخشی بیلمیرلرکی بیزیم ایستر دینچیمیز و ایستر سه ده سولچوموز , چوخداندر کی بو ملی شرف پالتارلاریندان سویونوب و ئوزون ملی هویت و ملی عاریندان سیلکه لیبدر , و یالنیز بیر نئچه سی , ملیت غمین , ایل غصه سین چکنلر وارسادا , اونلاردا ئوز – ئوزلرین ییب چوروده جکلر , بودرکی داها تورک دشمنلرینین ایشی اولدوقجا راحت و دینج , دئدیکجه آساندر .